يبه وينك
أشوفه طول غيابك
ومن وداك ما جابك
يبه وينك
ولهت لنظرة من عينك
يبه ارجع ورب الكون انا ولهان
صحيح اللي يقولونه...
خلاص ماراح لنا ترجع..
كذب .. ما راح أصدقهم..
يبه وينك
عسى الداعي يبه بس خير
عساك بخير ...
مداين تكرم لعينك ...
بس أرجوك علمني ...
علمني .. يبه وينك
سألت أمي عن رجوعك ...
ولا كني أعرفك وين
و قالت ..
ما يدوم الزين
و أنا .. عندي أمل للحين ..
في رجوعك..
يبه بس تكفى علمني ....
متى رجوعك
يبه بس تكفى علمني .
وش أحلى من طلوع اثنين
طلوع الشمس .... و طلوعك
يبه وينك
سألت أمي ...... غيابك طال
ولا كنّي أعرفك وين
و قالت مثل ما قالت ..
حسافه ...
ما يدوم الزين ...
مع كل هذا صدقني ..
أنا عندي أمل للحين
سؤالي عنك يالوالد .
صار كما الموال
و أشوفه طال ...
والله طال ..
حزين .. بلحنه و حروفه ...
يخاف .. يموت من خوفه ...
و قلب ٍ كان أقوى قلب ...
ضعف .. من قسوة ظروفه ..
يبه ..
أرجوك علمني ...
تشوف اللي أنا أشوفه
أنا أشوفك نهار و ليل ...
في غرفة نومك وفي المجلس وفي الملحق
وعند الباب على الدكة
تنتظر المؤذن يأذن لجل تروح وتصلي
وتدعي الرب ييسر لي
وأشوفك دوم عند الباب
يبه ارجع طلبتك يا يبه ترجع
دنيا بلياك ما تسوى شوي تراب..
مع إني ادري ما ترجع !!
غريبة .. بعدها تدمع ..
عيوني من هموم البين !!
و ادري به مكانك وين !!
مع َ هذا .. أرد و أسأل !!
يبه ....
وينك ؟؟
جرح ٍ عذّب أحبابك ....
يبه ..عيّا يخف و يطيب !!
يبه.. كل جرح في الدنيا ..
مصيره بالدوا يلتم ...
و لكن البلى من جرح ..
نزف فرقاك ... بليّا دم !!
و هذا الفرق في جرحي ...
عجز يلقى الدوا دكتور ..
أنا جرحي غريب الطور !!!
ينزف ... بس بليّا دم ..
وزاد الهم فوق الهم ...
و دام انك يبه غايب ...
جروح الغيبة ما تـلتم ..
بس عندي أمل للحين !!
و لا كنّي أعرفك وين !!
يبه .. ذكراك تفرحني ....
في نفس الوقت تجرحني !!
لا من جبت في طاريك ...
دموعي غصب تفضحني ....
يبه.. ارجع .. باكر تبدأ اختباراتي..
يبه وينك منو بيشوف تقريري
بإذن الله أباخذ نسبة الممتاز
يبه ارجع..
منو اللي بياخذ بأيدي
منو اللي إلى أخطيت يوعيني
يبه وينك..يبه ارجع
تبي عيني لجل ترجع..
تبي الثنتين لجل ترجع..
تبي قلبي .. تبي روحي .. أنا كلي فدا راسك
بس تكفون يا يبه ارجع..
زمن قاسي ..
زمن قاسي ...
اخذ مني بلا رحمه
اخذ مني اعز ناسي !!
و خلاّ لي سهر هالليل ..
في عيني ضيف ..
ألا يا حيف !!
يبه وينك ؟؟
يبه تذكر ليالي الصيف..
يوم الكل في بيتك ضيف..
وكرم قلبك مع هالناس
من رحت راحت سعادتنا ..
تعال وكملها جمعتنا..
تعال وشوف الكل عليك يسأل
وينك يالزعيم وينك
من غبت والكل يجتمع عندنا في الدار
وينهم قبل لا تأخذك الأقدار
وينهم قبل لا تروح وما ترجع
وينهم يومك تمناها جمعتهم
بعد مارحت اجتمعوا
الكل نادم على مافات
والندم من بعد مايفوت الأوان
الندم ما ينفعك
يبه تذكر شطانـتـنا ؟؟
أنا و أخواني وخواتي ...
معانا عيال خالاتي ..
نلعب في زوايا البيت ..
يبه ... والله أنا حنيت ..
لذاك الوقت في وجودك ...
ألا يا ريت ... ألا يا ريت ...
ترجع .. يا يبه حنيت ..
حسافه الدنيا ما ترحم ...
خذت منا سعادتنا ...
خذتك بعيد .. و خلتنا !!!
يبه أمي تذّكرنا ...
بأيامك قبل ما تروح ...
تناديها.. يا روح الروح ..
تغازلها و تنظر لك ..
مثل طفله ...
ملامحها عشق مفضوح ...
في ذاك الوقت .. كنا صغار ...
معَ هذا ... كنا نغار ..
عليها .. أو بعد منها ... كنا نغار
نحبك يا يبه ... ارجع
مثل شمس الفجر .. اطلع
حزينة الشمس في غيابك ..
و نفس الحزن في أحبابك ..
وأخاف الشمس من حزني ..
تغيب و ما بعد تطلع !!
يبه ارجع !!
إذا لي خاطر فـ قلبك ..
تعال و زورنا بس يوم ...
مع انه ما يكفينا .. نشوفك يوم ..
نبي حضنك يدفينا .. و نشوفك دوم ..
يبه سامحني بترخّص ...
قبل ينشف حبر الأقلام ..
كلامي بعده ما خلّص ..
و لكن موعد الأحلام ..
حان ..
ولازم أوفي له..
بعد ما ضاعت الحيلة ..
أشوفك والوعد باكر !!
إذا فكّر يجي باكر ..!!
و برجع أسألك وينك !!
بس لازم تجاوبني ..
ترى عندي أمل للحين !!
و لا كني أعرفك وين ..!!
رد مع اقتباس
